Tag Archives: ETHIOPIAN NEWS

Surveillance camera footage: The Assault of Ethiopian parking lot Attendant

7 Apr

On April 4, 2012, at 7:42pm, an unknown male accompanied by a female was captured on surveillance video entering the EZ Park parking lot located at 1309 Locust Street. This male approaches the lot attendant and becomes involved in a conversation. The suspect then strikes the Ethiopian attendant, Asrat Mulugeta on the side of his head with a brick and losses consciousness. The suspect then fled the lot in an unknown direction followed by two females.

Suspect Description:
Black male, 30 years-of-age, black jacket, blue jeans , shoulder length dreadlocks accompanied by two females.
Persons of Interest:
#1 Female wearing a pink sweatsuit, yellow bag and a backpack
#2 Female wearing olive green colored pants and a dark jacket

If you see this male do not approach him, contact 911 immediately.
To submit a tip via telephone, dial 215.686.TIPS (8477).

If you have any information about this crime or this suspect please contact:
Central Detective Division
215-686-3093/3094
Det. Gallagher #9218
DC#12-06-016397

የአፍሪካ ኀብረት ዓለም በቃኝ ገባ

6 Feb


ፕሮፌሰር መስፍን ወ/ማርያም
የዛሬ አርባ ዘጠኝ ዓመት ግድም በአፍሪካ አዳራሽ የአፍሪካ አንድነት ድርጅት (የዛሬው የአፍሪካ ኀብረት) ሲመሠረት ተመልካች ሆኜ ገብቼ እዚያው አድሬአለሁ፤ የዛሬዎቹ ወጣቶች ያቺን ኢትዮጵያና እነዚያን ኢትዮጵያውያን የሚያውቋቸው አይመስለኝም፤ አንዳንዴ ሳስበው ግምትም ያላቸው አይመስለኝም፤ የነሱ ጥፋት አይደለም፤ ሥርዓት ባለው መንገድ ሥራዬ ብሎ፣ የአገር ጉዳይ ነው ብሎ ያስተላለፈላቸው የለም፤ ዛሬ የንክሩማ ሐውልት በአፍሪካ ኀብረት ግቢ ቆመ የሚል ወሬ ስሰማ ደርግ በአፍሪካ አዳራሽ መግቢያ ላይ የሌኒንን ሐውልት መትከሉን አስታወሰኝ፤ ዛሬ ደግሞ ወያኔ ከማን አንሼ ብሎ የንክሩማን ሐውልት በአፍሪካ ኀብረት ግቢ ውስጥ ተከለ፤ ንክሩማ ትልቅ አፍሪካዊ ነው፤ ነገር ግን ለአገሩም አልበቃም፤ በምንም ዓይነት መንገድ አጼ ኃይለ ሥላሴን አይተካም፤ ኢትዮጵያ ሰው አጥታ ከጋና መበደርዋ ኢትዮጵያ የወረደችበትን አዘቅት ያሳያል፤ እነማን ይዘዋት እንደወረዱም ግልጽ ነው፤ አንድ ሰው ብቻ፣ አጼ ኃይለ ሥላሴ፣ የተዋረዱ እንዳይመስለን፤ የተዋረደችው ኢትዮጵያ ናት፤ እንደተለመደው ጠምዝዘው ጋናን ማጣጣል ወይም የጋናን ክብር መቀነስ አድርገው የሚያቀርቡት ይኖሩ ይሆናሉ፤ የምለው ጋና ከኢትዮጵያ አትቀድምም፤ ንክሩማም ከአጼ ኃይለ ሥላሴ አይቀድምም ነው፤ ንክሩማም ቢኖር በአፍሪካ ኀብረት ጉዳይ ከአጼ ኃይለ ሥላሴ ጋር ለውድድር አይቀርብም ነበር፤ ጋና ነጻ በወጣችበት እለት በዓሉን ለማድመቅ የሄዱት ልዑል ሣህለ ሥላሴና አቶ አበበ ረታ ነበሩ፤ ከተመለሱ በኋላ አቶ አበበ በብሔራዊ ቤተ መጽሐፍት ስለጋና ንግግር አድርገው አዳምጫለሁ፤ ኢትዮጵያኮ በኢጣልያ ወረራ ጊዜም የአርበኞችዋን ነፍስ ይማርና ሰንደቅ ዓላማዋ ሲውለበለብባት የነበረች አገር ናት፤ የአርበኞችዋን ነፍስ ይማር! ሐውልት ባናሠራላቸውም ሲናቁብን በአርምሞ ልናልፈው አንችልም፡፡
አርበኞችን ወደዳር ማስወጣትና የሥልጣን ወንበሮችን በባንዳዎች ማስያዝ አጼ ኃይለ ሥላሴ የጀመሩት ቢሆንም ለልጅ ልጅ የሚተላለፍ የአገር ውርደት መሆን የለበትም፤
በቅርቡ ሪፖርተር በርእሰ አንቀጹ የሀሳብ ማጠራቀሚያ (ቲንክ ታንክ) በሚል ርእስ ጽፎ ነበር፤ ከሹሞቹ ውጭ ሰዎች መኖራቸውን፣ የማሰብ ችሎታ ያላቸው መሆኑን፣ ሀሳባቸውን የሚያዳምጥ መኖሩን ካላረጋገጥን ሀሳቦች ዋጋ የላቸውም፤ የንክሩማን ሐውልት በኢትዮጵያ ለመትከል ወይም የሌኒንን ሐውልት በኢትዮጵያ ለመትከል ከአንድ ሰው በቀር አይወስንም፡፡

የአፍሪካ አንድነት የተቋቋመው እ.ኤ.አ. በ1963ዓ.ም. ነው፤ በዚያን ጊዜ ኢትዮጵያ በመላው ዓለም ከፍ ያለና የተከበረ ስም ነበራት፤ በአፍሪካ ያለምንም ጥርጥር ቀዳሚዋ አገር ነበረች፤ ኢትዮጵያን ለዚህ ያበቃት ረጅም የነፃነት ታሪክዋ፣ የህዝቡ ጨዋነት፣ የመሪዎቹ፣ በተለይም የቀዳማዊ ኃይለ ሥላሴ ግርማና ሞገስ አንድ ላይ ሆነው ኢትዮጵያን የተከበረችና የተፈራች አገር አድርገዋት ነበር፡፡
ለአፍሪካ ኀብረት የተሰበሰቡት በዘመኑ የነበሩ ታላላቅ መሪዎች፣ አገሮቻቸውን ከቅኝ አገዛዝ ያወጡ ሰዎች ነበሩ፤ መሪዎቹ በየሰፈራቸው የጎረቤቶች መኀበር እያቋቋሙ ለትልቁ የአፍሪካ አንድነት እምብዛም ግድ አልነበራቸውም፤ ምናልባትም የአፍሪካ አንድነት ድርጅትን በማቋቋም እያንዳንዳቸው በየአገራቸው ያላቸው ሥልጣን የሚ¬¬¬-ቀነስባቸው መስሎአቸው የነበረ ይመስለኛል፤ አብዛኛዎቹ እናጥናው፣ እናብላላው በማለት የድርጅቱን ምሥረታ ለማስተላለፍ በፓም ይጥሩ ነበር፤ አጼ ኃይለ ሥላሴ ግን የድርጅቱ ሰነድ ሳይፈረም ማናችንም ከአዳራሹ አንወጣም ብለው ገትረው ያዙአቸው፡፡
የአጼ ኃይለ ሥላሴ ትልቅነትና የኢትዮጵያ የመንፈስ መሪነት በገሀድ ታየ፤ እንደናስርና እንደቤን ቤላ ያሉ አብዮተኞች ሳይቀሩ ከጃንሆይ ጋር ሲነጋገሩ ጎንበስ ብለውና እጆቻቸውን ወደኋላ አጣምረው ነበር፤ መቼም የዚህ ፊልም አንድ ቦታ ይኖራል ብዬ ተስፋ አለኝ፤ የዛሬ ወጣቶች ሁሉ ሊያዩት የሚገባ ነው፤ እምቢተኞቹንና አፈንጋጮቹን ሁሉ አንድ በአንድ እያነጋገሩ፣ እንደኒዬሬሪና አሚን ተጣልተው የማይነጋገሩትን እያስታረቁ ሰነዱ ሳይፈረም መውጣት የለም አሉ፤ እንደማስታውሰው ሰነዱ ከሌሊቱ በስምንትና በዘጠኝ መሀከል ተፈርሞ አለቀና ሲነጋ በየቤታችን ገባን፡፡
የአፍሪካ አንድነት በጋዳፊ (ነፍሱን ይማረውና) ውትወታ የአፍሪካ ኀብረት ተባለ፤ ስልቻ ቀልቀሎ፣ ቀልቀሎ ስልቻ ነው፤ ዓላማው የአፍሪካን ሕዝቦች የኑሮ ደረጃ ከፍ ለማድረግ፣ የአፍሪካ አገሮችን ሉዓላዊነትና ነጻነት ለመጠበቅና ከማናቸውም ዓይነት ቅኝ አገዛዝና ቄሣራዊ ተጽእኖ ለመከላከል ነበር፤ ነበር፤ ነበር፤ በአገሮች መሀከል የሚከሰቱ ችግሮችን ሁሉ በሰላማዊ መንገድ መፍትሔ እንዲገኝላቸው ማድረግ ነበር፤ ነበር፤ ነበር፡፡
እንደዚያ ዕለት በኢትዮጵያዊነቴ ኮርቼ አላውቅም፤ ስለዚህም የኢትዮጵያውያን የዩኒቨርስቲ መምህራን ማኀበር ስብሰባ ጠራሁና ያየሁትን ገልጬ ለአጼ ኃይለ ሥላሴ የምስጋና ደብዳቤ እንጻፍላቸው የሚል ሀሳብ አቀረብኩ፤ አንዳንድ ተቃውሞ ተነሥቶ ከተከራከርንበት በኋላ እንዲጻፍላቸው ተወሰነ፤ ዳብዳቤውን ጽፌ ለጃንሆይ እንዲሰጥልን ለዩኒቨርስቲው ፕሬዚደንት ለልጅ ካሣ ወልደማርያም አስረከብሁት፤ ከጥቂት ቀናት በኋላ ጠራኝና አንተው ወስደህ ብትሰጥ ይሻላል አለኝ፤ የምሄድበትን ቀንና ሰዓት ነገረኝ፤ ወስጄ በእጃቸው ሰጠኋቸው፤ እንዳነበቡት ወይም እንደተነበበላቸው ፍልቅልቅ ባለ ደስታቸው ይታይ ነበር፡፡
ዛሬ የአፍሪካ አንድነት (ኀብረት) በቻይና ቸርነት ፎቅ ተሠርቶለት ዓለም በቃኝ ገባ አሉ፤ የአፍሪካ መሪዎችም እዚያው ተሰበሰቡ፤ አቶ መለስም ለቻይና አስተዋጽኦ ዋጋ ለመክፈል ለማኦትሴ ቱንግ ተማሪ ሐውልት አስተከለ፤ ቀጥሎም የአፍሪካ መሪዎች በምን ምክንያት ወደ አውሮፓ ዓለም-አቀፍ ፍርድ ቤት ይሄዳሉ በማለት አቶ መለስ ተቆጥቶ በዓለም-በቃኝ ፎቅ ውስጥ የአፍሪካ ፍርድ ቤት ማቋቋም እንችላለን የሚል ሀሳብ አቀረበ ተባለ፤ ማን በማን ላይ እንዲፈርድ ይሆን? የአውሮፓ ዓለም-አቀፍ ፍርድ ቤት የተፈራው ምኑ ነው? ወይስ የዓለም-አቀፍ ትርጉም ችግር ሆኖ ነው? መቼም የአፍሪካ ፍርድ ቤት ዓለም-አቀፍ ደረጃ ላይ ይውጣ ማለት…ምን ማለት ይሆን? የተባበሩት መንግሥታትስ መቼ ነው ተለይቶ ‹‹አፍሪካዊ›› የሚሆነው?
ለማናቸውም በእግዚአብሔር መንግሥት ውስጥ ሆነው የሚመለከቱን የኢትዮጵያ አርበኞች ይቅር ይበሉን፤ ለኢትዮጵያም ከሌኒን ያወጣት አምላክ ያውቃል!

ወግ ነው ሲዳሩ ማልቀስ ይባል ነበር ዱሮ ወግ ነው ምርጫ ማሸነፍ ሆነ ዘንድሮ! አስተሳሰብና ጉልበት (ሕገ አራዊት)

31 Jan

ፕሮፌሰር መስፍን ወ/ማርያም

በረከትን በደንብ የሚያውቀው ያሬድ ጥበቡ ሙልጭ አድርጎ ነግሮታል፤ ያሬድ ከዚህ በፊትም ስለበረከት ጽፎ ነበር፤ አሁን ከጻፈው ጋር ሳስተያየው አንድ ግጥም ትዝ ይለኛል፤ አንዲት የቸገራት ሴትዮ ያንጎራጎረችው ይመስለኛል፡-

ወደድኩህ ወደድከኝ፤ ጠላሁህ፤ ጠላኸኝ፤
እንደሚጣራ ጠጅ እየጣልክ አታንሣኝ!

ያሬድ ስለበረከት በሚጽፈው ሁሉ እያነሣ የመጣልና እየጣለ የማንሣት ዝንባሌን ያሳያል፤ እስከዛሬ በናፍቆት የሚጠብቀውን ወዳጁን ሸፍጥንና የአእምሮ ሕመምን ሲያለብሰው ማንኛቸው መቼ እንደተለወጡ ለመረዳት ያስቸግራል፤ ለማናቸውም የዲክንስን መጽሐፍ ያሬድ እንደሚለው በረከት ከመጀመሪያው ገጽ በላይ አነበበም አላነበበ እንግሊዝኛው ትርጉም መሆኑን የተረዳሁት ከያሬድ ነው፤ ለምን ወደ እንግሊዝኛ እንደተሄደም አልገባኝም፡፡

በዚህ ዓመት ታላላቅ የአገር መሪዎች የሚያስተምሩን ነገር ባይኖራቸውም ‹‹የታሪክ››መጽሐፍት የሚሉትን አሳትመዋል፤ ኮሎኔል መንግሥቱ ኃይለማርያምና አቶ በረከት ስምዖን፤ ሁለቱ ሰዎች በብዙ ነገር የሚመሳሰሉ ቢመስሉም እውነትን በመናቅና በመጥላት አንድ ናቸው፤ ዛሬ እኔ ላነሣ የፈለግሁት ግን በአስተሳሰብ ግድፈት ላይ የሚያተኩር ነው፡፡

በ1997 የፖለቲካ ክርክር ላይ ከሕገ መንግሥቱ አንቀጾች ሠላሳ በመቶ የሚሆነው ስለሰብዓዊ መብቶች የሚናገር ስለሆነ ይህ ቀረው የሚባል አይደለም፤ ችግሩ በተግባር የምናየው ሕገ አራዊት መሆኑ ነው ብዬ የተናገርሁትን ጉልበተኛው በረከት ወዲያው ቀለብ አድርጎ ‹‹ሕገ መንግሥቱን ሕገ አራዊት ነው አለ፤›› ብሎ ወነጀለኝ፤ ለጉልበተኛው ሕገ ኀልዮትም ሆነ ሕገ መንፈስ ቅዱስ ገንዘቡ አይደሉም፤ ዛሬ ረዳቱ የሆነውም ጠበቃው የገዛ ጆሮውን ከድቶ በጉልበተኛው የተነገረውን እያስፋፋ በፍርድ ቤቱ አስተጋባ፤ ዳኞቹም ጠበቃውን ሰምተው ፈረዱ፤ ዛሬ እነሱ አንገታቸውን አጎንብሰው ይሄዳሉ፡፡

ዛሬም ያው አስተሳሰብ (አስተሳሰብ ካልነው) እንደተለመደው ቃላትን እየዘለዘለ ለውንጀላ ያቀርባል፤ አንዱዓለም አራጌ ‹‹የአምባ ገነን አገዛዝ ባለበት የጀግና ቤቱ እስር ቤት ነው፤›› አለ ይባላል፤ ጉልበተኛው እንደለመደው መጀመሪያ የተባለውን ቀንጭቦ ኪሱ ከተተና (!)አንዱ ዓለም ‹‹የጀግና ቤቱ እስር ቤት ነው›› አለ ብሎ ለውንጀላ ያመቻቸዋል፤ የአንዱ ዓለም መታሰር እሱ ራሱ ያለውን ያረጋግጣል? ወይስ አለ የተባለውን ያረጋግጣል? ወይስ ሁለቱንም ያረጋግጣል? በመሠረቱ አንዱ ዓለም ያለው ሙሉ ቃልና ጎዶሎው ልዩነት የላቸውም፤ የጉልበት አገዛዝ ባለበት የጀግና ቤቱ እስር ቤት ነው፤ የሚለውና ያለመነሻ የጀግና ቤቱ እስር ቤት ነው፤ የሚለው በአንድ ነገር ይመሳሰላሉ፤ ጀግናን የጥቃት ኢላማ በማድረግ ይስማማሉ፤ ከዚያም አልፎ ጀግንነትን መጠቃት አድርገው የሚያቀርቡት ይመሳሰላሉ፤ የተዛባ አስተሳሰብ!

ቀጥዬ የምጠቅሰው ምሳሌ ከላይ ከተጠቀሱት የባሰ የአስተሳሰብ ግድፈትን የሚያመለክት ነው፤ አቶ መለስ ‹‹የተሃድሶ እንቅስቃሴያችንን በከፍተኛ ፍጥነት ከሚወርድና በየደቂቃው ፍጥነት እየጨመረ ከሚጓዝ ናዳ አምልጦ ወደ ጠንካራ ከለላ ለመግባት ከሚሮጥ ሰው ጋር ማመሳሰል ይቻላል፡፡›› ሲል ለስራ አስፈፃሚ ኮሚቴው ባቀረበው ሪፖርት ውስጥ ተናግሮአል፤ በ1997 ምርጫ አቶ መለስ ብዙ አጃቢዎቹ (አቶ በረከትን ጨምሮ) ስለዌደቁበት የናዳውን ኃይል በትክክል ገምቶ የተናገረ ይመስለኛል፤ መለስ የተናገረው ወደበረከት ስምዖን ጆሮ ሲደርስ ግን ሌላ ሆኖ ነበር፤- ናዳን የገታ አገራዊ ሩጫ! መለስ ወደፊት ሂድ! ሲል በረከት ስምዖን ቀኝ-ኋላ ዙር! ይላል፤ ወደፊት አልሮጥም የማለት መብት አለው፤ ጥያቄው ይህ አይደለም፤ የአስተሳሰብ ግድፈቱ ወደፊት ሂድ ማለትና ቀኝ-ኋላ ዙር ማለትን አንድ ማድርጉ ላይ ነው፤ በወያኔ/ኢህአዴግ ዘመን የመጣ የአፈፃፀም ጉድለት የሚባለው ነገር ምንጩ እንዲህ ያለ የግንዛቤ መዛባት መሆኑ ነው፡፡

ለምራቂ አንድ ሌላ ግድፈት ላቅርብ፤ የመጽሐፉ ዋና ርዕስ ‹‹የሁለት ምርጫዎች ወግ›› ነው፤ ምን ማለት ነው? ወግ የሚለው ቃል ሁለት ትርጉም አለው፤ አንዱ ትርጉም ወሬ ነው፤ ሁለተኛው ትርጉም ሥርዓት ማለት ነው፤ ከሃምሳ ዓመታት በፊት በዛሬይቱ ኢትዮጵያ ላይ በራስ ቢትወደድ እንዳልካቸው የተደረሰ ጨዋታ በቀዳማዊ ኃይለ ሥላሴ ቲያትር ታይቶ ነበር፤ አቶ አሐዱ ሳቡሬ ሲተቹ ድራማ ብለውት ነበር፤ እኔ ግን ጨዋታ ነው ብዬ ‹‹አልሞትኩም ብዬ አልዋሽም›› ለዚያ ለሞተ ጨዋታ ተስማሚ ስም ነው በማለት ጽፌ ነበር፤ እንዲሁም የሁለት ምርጫዎች ወግ በሁለቱም የወግ ትርጉሞች ተስማሚ ስም የተሰጠው ተረት ነው፤ እውነቱ ጸሐፊው በዚያ ምርጫ መውደቁ ነው፤ እውነቱ ጸሐፊው እንደገና በልዩ ዝግጅት ተመረጠ መባሉ ነው፤ ታሪክን፣ ያውም የቅርብ ታሪክን ወደተረት ለመለወጥ ለጉልበተኛም ቢሆን አስቸጋሪ ነው፤ ተዋንያኑ ሁሉ ገና በሕይወት አሉ፤ ጸሐፊው ልማድ ሆኖበት አላነበባቸውም እንጂ አንዳንዶቹም ስለምርጫው ከወግ ባለፈ ጽፈዋል፡፡

ስለ2002 ምርጫ በቅርቡ እንኳን በአሐዝ የተደገፈ ጥናት ወጥቷል፤ አንደኛ ከአጠቃላይ የየክልሉ ሕዝብ ቁጥር ውስጥ የመረጡትን ስናይ ምርጫው ወግ ብቻ እንደነበረ ገሀድ ይሆናል፤ ለምሳሌ ከየክልሉ የመረጡት በኦሮሚያ 31 ከመቶ፣ በአማራ 33 ከመቶ፣ በደቡብ 27 ከመቶ፣ በትግራይ 39 ከመቶ፣ በአዲስ አበባ 19 ከመቶ፣በአፋር 66 በመቶ፣ ከዚያ ደግሞ በድሬደዋ 57 ከመቶ ሲሆኑ በሐረርና በኦጋዴን ደግሞ ለወግም የማይመች በመሆኑ አልተገለጸም፤ ናዳው የምርጫውን ወግ እንኳን እንደደፈጠጠ በተለይ የአፋርና የድሬዳዋ የመራጮች አሐዝ ምስክር
ነው፤ እድሜያቸው የማይፈቅድላቸው ሁሉ ካልመረጡ በቀር፤ ወይም በእነዚህ ክልሎች አብዛኛው ሕዝብ በልዩ ተአምር እድሜው ከ18 ዓመት በላይ ካልሆነ በቀር ከላይ የተገለጸውን ያህል መራጭ ሊያገኙ አይችሉም፤ እንዲሁም በመረጡት ወንዶችና ሴቶች መሀከል በየክልሉ የሚታየው ድርሻ ወንድና ሴቱ እኩል እንዲሆን ተደርጎ የተደለደለ መሆኑ ይታያል፤ ይህንን ሁሉ የዘነጋ ከታሪክ ይልቅ ወደተረት ያዘነበለ ጨዋታ ነው፤ ተረቱ የሚጣፍጠው ከተገኘ!

ሁለተኛ አቶ ኡስማን አሊ የሚባል ሰው 368,211 ድምጽ፣ አቶ ሽመልስ ከማል ብርሃን የሚባል ደግሞ 19,647 ድምጽ ለወጉ አግኝተው ተመርጠዋል፤ ከተመራጮቹ 64 በመቶ ያህሉ ያገኙት ድምጽ ከ50,000 በታች ነው፤ መለስ ዜናዊ ያገኘው 40,302 ነው፤ በትግራይ ወይዘሮ አልማዝ የሚባሉ 87,185 ድምጽ ማግኘታቸው ቱባ ቱባ ባለስልጣኖቹ ካገኙት ጋር ሲወዳደር ሰማይ ያደርሳቸዋል ስለ2002 ምርጫ በአገቱኒ ውስጥ ዝርዝር መረጃ ቀርቦአል፡፡

መጽሐፍ ያውም የታሪክ መጽሐፍ ለመጻፍ ለእውነት ክብር መስጠትና ለእውነት ተገዢ መሆን ያስፈልጋል፤ አለዚያ ጉልበትና የአቶ አላሙዲንን ገንዘብ ማጥፋት ነው፡፡

Feteh

ለምን ይዋሻል?

9 Jan

ለፋሲካ ይወጣል ለተባለው አልበም 4ሚ. ብር ተከፍሎታል

የቴዲ አፍሮ አልበም ለገና አልደረሰም

ነጠላ ዜማዎቹ አነጋጋሪ ሆነዋል

ቴዲ አፍሮ ከየት ወዴት?

አንጋፋውና ተወዳጁ ድምፃዊ ቴዎድሮስ ካሣሁን (ቴዲ አፍሮ) ሙሉ አልበም ካሰማን ረዘም ያለ ጊዜ ያስቆጠረ ይመስለኛል፡፡ ለነገሩ ቴዲ አልበም በጥድፊያና ቶሎ ቶሎ በመልቀቅ አይታወቅም፡፡ ሥራዎቹ የታሹና በጥንቃቄ የሚሰሩ ስለሆነ ዓመታት ይፈጃሉ፡፡ ድምፃዊው ይሄን የሚያካክሰው ነጠላ ዜማዎች በመልቀቅ ይመስላል፡፡ አንዳንዶች እንደሚሉት ቴዲ “የነጠላ ዜማዎች ጌታ” ነው – በየጊዜው በርካታ ዜማዎችን ለቋል፡፡ ሰሞኑን በተለያዩ ጊዜ የወጡ 6 ነጠላ ዜማዎችን አግኝቼ አድምጫለሁ፡፡ ለነገሩ ሙሉ አልበም ይወጣል ተብሎ በሚጠበቅበት ወቅት ነው ነጠላ ዜማዎቹ የተለቀቁት፡፡ ምንጮች እንደሚሉት አዲስ ለሚያወጣው አልበም ድምፃዊው ከፍተኛ ገንዘብ በመከፈል በኢትዮጵያ የሙዚቃ ኢንዱስትሪ ታሪክ ሪከርድ ሰብሯል – ለአንድ አልበም 4ሚ. ብር ተከፍሎታል ተብሏል፡፡ እነዚሁ ምንጮች ቅድምያ ክፍያም (ቀብድ) መውሰዱንም ይናገራሉ፡፡ ይሄን ያህል መረጃ ከነገርኳችሁ ይበቃል፡፡ አሁን ደግሞ አዲስ ወደተለቀቁት የቴዲ ነጠላ ዜማዎች ልውሰዳችሁ፡፡ ቴዲ አፍሮ አዲስ የዘፈን አልበም እንደሚያወጣ መነገር ከጀመረ በርካታ ወራትን አስቆጥሯል፡፡ አርቲስቱ ራሱ ባለፈው ዓመት መዝጊያ ላይ በአርቲስት ግርማ ተፈራ የአልበም ምርቃት ላይ ተገኝቶ ሥራውን ለገና በዓል እንደሚለቅ ተናግሮ ነበር፡፡ በሙሉ አልበም የተጠበቀው አርቲስት፤ የማታ ማታ በአርቲስት ኩኩ ሰብስቤ ‹‹የበረሃ አገር ስደተኛ›› ነጠላ ዜማ ላይ አጃቢ በመሆን ‹‹ቆሜ ስነቃ›› በማለት ድምጹን አሰማ፡፡ የአርቲስት ቴዲ አፍሮ አዲስ አልበም ግን ለገና አልደርስ ብሎ ለፋሲካ ቀጠሮ ተይዞለታል፡፡ በምትኩ ታዲያ ‹‹ውዴ›› የተሰኘ አንድ ነጠላ ዜማ መሰረቁን በብዙሃን መገናኛ ይፋ አድርጐ ነበር – አርቲስቱ፡፡ መረጃዎች እንደሚጠቁሙት፤ ሬዲዮ ጣቢያዎች ይህንን ነጠላ ዜማ እንዳያስተላልፉ የጹሑፍ ማሳሰቢያ ልኮ ነበር – ቴዲ፡፡ ጥቂት ቀናት ቆይቶ ደግሞ እንዲህ ያለ ነገር ሲገጥመው መፍትሔ ከሚሰጥበት መንገድ አንዱ፣ ዘፈኑን አሻሽሎ ማቅረብ መሆኑን በመግለጽ ተሻሽሏል ያለውን አስደመጠ፡፡ እኔ በበኩሌ ግን የጃፓኖችን ኢንስትሩመንታል የመሰለ ሙዚቃ በየመሃሉ ከማስገባቱ በቀር ምንም የተሻሻለ ነገር አላየሁበትም፡፡ “ውዴ” በሚል የሰራው ዜማ ከመጽሐፍ ቅዱሱ “መሐልዬ መሐልዬ ዘ ሰለሞን” እና ከተለያየ ምዕራፍ በተወሰዱ “ውዴ፣መስክ፣የወይን ሥፍራ፣የዐይን ጫፍ፣የወይን አጥር ጋራ፣አጥሩም ድንበሩም፣ባለጸጋ፣የወይን ቦታ ጠባቂ፣የጸደይ ወራት” …..የመሳሰሉ ቃላት የተሞላ ግጥም ነው፡፡ እንዲያም ሆኖ ግን ‹‹ውዴ›› የተሰኘው ዘፈን ከመሰረቅ አልዳነም፡፡ ለነገሩ የቴዲ ዘፈን “ተሰረቅሁ” ስሞታ አዲስ ነገር አይደለም፡፡ ለመጪው አልበም የጉጉት መፍጠሪያ ቴክኒክ ይሁን አሊያም የአድማጭ አስተያየት መመዘኛ ከጥርጣሬ በቀር ምንም ለማለት አልቻልኩም፡፡ እውነቱን የሚያውቅ እሱ ብቻ ነው – ተወዳጁ ድምፃዊ ቴዲ፡፡ ወህኒ ቤት ሳለም ተሰረቅሁ ማለቱን አስታውሳለሁ፡፡ የዘፈኑ አጠቃላይ ሐሳብ ድምፃዊ ጸጋዬ እሸቱ ከረዥም ዓመት በፊት ‹‹ለሰርጓ ተጠራሁ›› ሲል ጥርት አድርጎ የዘፈነውን ዘፈን በእጅጉ ይመሳሰለዋል፡፡

ሰሞኑን ከተቀለቁት ዜማዎች የሚጠቀሱት ‹‹ፊዮሪና” እና “ልረሳሽ አልቻልኩም›› የሚሉት ሁለት ዘፈኖች ዜማ ደግሞ ተስፋይ ተክለእዝጊ ከተባለ ኤርትራዊ ድምጻዊ የተቀዳ ወይም የተኮረጀ ይመስላል፡፡ ዜማው የተኮረጀ ቢሆንም ግን ግጥሙ አዲስ ነው፡፡ሐሳቡም ቀደም ሲል ቴዲ ካቀነቀነው ‹‹ብንለያይም ልረሳሽ አልቻልኩም›› ዜማ ጋር ይመሳሰላል፡፡

ከራሱ ዜማ የተኮረጀ ነው ማለት ይቻላል፡፡ ‹‹አይደነግጥም ልቤ፤ ለሌላ ልቡን አይሰጥም›› የሚለው ሦስተኛው ዜማ ጭብጥ ከዚህ ቀደም ከሰማኋቸው የበርካታ አርቲስቶች ተደጋጋሚ ዘፈን አንድም የተለየ ነገር የለውም፡፡ አጠቃላይ ሐሳቡም ‹‹ልቤ ምንም ሌላ ቆንጆ ቢመለከት አይደነግጥም፤ አንቺን በጣም እወድሻለሁ››የሚል ነው፡፡ ቴዲ የኢትዮጵያ ዘፋኞች የድምፅ መሞረጂያ የሚመስለውን የፈረደበትን ‹‹ዓባይ›› በነጠላ ዜማ ልሞክረው በሚል በአባይ ዙሪያ አቀንቅኗል፡፡ የቴዲ‹‹ዓባይ››ም ግን ከቀደሙት የተለየ አዲስ ነገር ይዞ አልመጣም፡፡ በአጠቃላይ ነጠላ ዜማዎቹ ኦሪጂናሊቲ (አዲስነትና ፈጠራ) ይጐድላቸዋል፡፡ ንግዲህ ቴዲ አዲሱን አልበምን የሚያወጣው ለፋሲካ በዓል ነው ተብሏል፡፡ ይሄን ያህል ጊዜ የጠበቀ አድማጭ ደግሞ ከድምፃዊው የላቀ ሥራ ቢጠብቅ ሊፈረድበት አይችልም፡፡ ካሁኖቹ ነጠላ ዜማዎች እንደምናየው ከሆነ ግን ቴዲ ቀላል የማይባል ፈተና ይገጥመዋል፡፡ በእርግጥ የተሻሉ የጥበብ ሥራዎችን ለመስራት ጊዜ አለው፡፡ የአድማጭን አንጀት የማያርሱ ዜማዎች ከማውጣት ደግሞ መዘግየቱ ይመረጣል፡፡ አርቲስቱ በእስካሁኑ ሥራዎቹ የአድማጭን ቀልብ በመቆጣጠር ዝናንና ተወዳጅነትን በአጭር ጊዜ መቀዳጀቱን ማንም ሊክድ አይችልም፡፡ ለዚህ የበቃው ደግም ሙያውን አክብሮና ለሥራው ተጨንቆ ተጠቦ ምርጥ ሥራዎች ይዞ ስለሚቀርብ ነው፡፡ በቀጣዩ አዲስ አልበሙም ተመሳሳይ ጥረት ይጠበቅበታል፡፡ ለነገሩ ነጠላዎቹን የለቀቀው አንዳንዶች እንደሚሉት የሥራዎቹን ተቀባይነት ለመመዘን ከሆነ ጥሩ አድርጓል፡፡ እኔም በግሌ ታዲያ በእንዲህ ዓይነት ሥራዎች ከመጣህ የሚያዋጣህ አይመስለኝም፤ የተሻሉና የጥራት ደረጃቸውን የጠበቁ ዜማዎች ሰርተህ ተመለስ ልለው እወዳለሁ፡፡ መልካም የገና በዓል – ለሁላችንም!!

Addis Admas

ሰማያዊ ፓርቲ ታህሣሥ 22 ቀን 2004 ዓም በይፋ የመስራች ጉባኤዉን አካሂደ፡፡

2 Jan

ሰማያዊ ፓርቲ ጠቅላላ ጉባኤውን አድርጎ አቶ ይልቃልን በሊቀመንበርነት መረጠ፡፡ በተጨማሪም 37 የምክርቤት አባላትና 5 የኦዲትና ቁጥጥር አባለት መርጠዋል፡፡
ሊቀመንበሩም በቅርቡ ካቢኒያቸውን ያሳውቃሉ ተብሎ ይጠበቃል፡፡
የክብር እንግዶቹ ፕ/ር መስፍን ወ/ማርያም፤ ዶ/ር ነጋሶ ጊዳዳ፤ ዶ/ር ያዕቆብ ኃ/ማርያም፤ አርቲስት ደበበ እሸቱ እንዲሁም ኢ/ር ሃይሉ በተወካያቸው በተገኙበት በተለያዩ የኢትዮጵያ ፖለቲካ ዙርያ ውይይ ቶች ተካሂደዋል፡፡ በቅርቡም የውይይቶቹን ሂደት በተንቀሳቃሽ ምስል በዩቲብ እና በፌስቡክ እንሚለቀቅ ተገልጻል፡፡

የሸራተኑ ምሽት – በአቶ በረከት መጽሐፍ

27 Dec

– አቶበረከትና ሼኽ መሐመድአሊ አልአሙዲ የተደናነቁበትምሽት
– አቶመለስ፣ ኢሕአዴግናአልአሙዲተወድሰዋል
– ኢሕአዴግ“የሕዝብፍቅር ያለው ፓርቲ” ተብሏል
– በመጽሐፉ ተቃዋሚዎችክፉኛ ተተችተዋል- በተለይ ዶ/ርብርሃኑ ነጋ
የኢሕአዴግ ነባር ታጋይ፣ የቀድሞው የማስታወቂያ ሚኒስቴር፤ አሁን ደግሞ የኮሙዩኒኬሽን ጉዳዮች ሚኒስትር እንዲሁም በምርጫ 97
ጉልህ ስፍራ የነበራቸው አቶ በረከት ስምኦን ጻፉት የተባለውን መጽሐፍ ለማንበብ በጉጉት ስጠባበቅ ነበር፡፡ ባለፈው ማክሰኞ
በመጽሐፉ ምረቃ ላይ ለመታደም ወደ ሸራተን አዲስ ሆቴል ያመራሁትም ከዚህ ጉጉት በመነጨ ስሜት ነው፡፡ የአቶ በረከት መጽሐፍ
የምረቃ ሥነ ሥርዐት የሚካሄደው ሸራተን ሆቴል ካሉት አዳራሾች በጣም ሰፊው እንደሆነ በሚነገርለት “ላሊበላ” አዳራሽ እንደሆነ የጥሪ
ካርዱ ላይ ስለተጠቆመ ወደዚያው አመራሁ፡፡ አዳራሹ በሰዎች ተጨናንቋል፡፡ ደራሲዎች፣ ድምፃውያን፣ ቲያትረኞች፣ የፊልም
አክተሮች፣ ሰዓሊያን፣ የማስታወቂያ ባለሞያዎች፣ ጋዜጠኞች፣ ባለሃብቶች፣ የኢሕአዴግ ባለሥልጣናት እና ሌሎች ተጋባዦች አዳራሹን
ሞልተውታል፡፡ አዳራሹ በርካታ ሰዎችን እንዲይዝ ታስቦ ይመስላል መቀመጫዎቹ በሙሉ ተነስተው እድምተኛው ቆሞ የዝግጅቱን
መጀመር ይጠባበቃል፡፡ የሸራተን አስተናጋጆችም በፈገግታ ተሞልተው መጠጥ ለታዳሚው ለማስተናገድ ይዘዋወራሉ፡፡“በሸራተን ምን
ጠፍቶ” በሚያስብል ሁኔታ ተበልቶ አይደለም ተደፍቶ የማያልቅ ምግብም ተዘጋጅቷል፡፡ በአጠቃላይ ድግሱ እጅግ የተዋጣለት የሚባል
ነው – የአቶ በረከት መጽሐፍ ምርቃት፡፡ የአቶ በረከት የመጽሐፍ ምርቃት ዝግጅት የአንዲት ነባር ታጋይ የመጽሐፍ ምርቃት ዝግጅትን
አስታውሶኛል፡፡ ነባር ታጋይና የአቶ ገብሩ አስራት ባለቤት የሆኑት የወ/ሮ የውብማር አስፋው የመጽሐፍ ምርቃት፡፡ ወ/ሮ የውብማር
የሕወሓት ሴት ታጋዮችን የትጥቅ ትግል ታሪክ የሚተርክ “ፊንክስዋ ሞታም ትነሳለች” የተባለ መጽሐፋቸውን ያስመረቁት
በኢምፔሪያል ሆቴል ነበር፡፡ ያኔ ግን እንዲህ ሞልቶ የተረፈ ሰው አላየሁም፡፡ እንዲህ ሞልቶ የተረፈ ምግብ እና መጠጥም አልነበረም፡፡
በእርግጥ ነባር ታጋይዋ ስልጣን ላይ እንዳልነበሩ አውቃለሁ፡፡ መጽሃፉን ያሳተሙላቸው ሼክ መሐመድ አላሙዲም አልነበሩም፡
፡ ከምሽቱ 12 ሰዓት ገደማ የተጀመረው የምርቃት ሥነ ሥርዐቱ ፣አቶ በረከት ለቤተሰባቸው በተለይም ለልጆቻቸው ያላቸውን ፍቅር
ባደነቁት በመድረኩ መሪ አቶ ሴኮ ቱሬ ነበሩ፡፡ በርካቶች በትወና ችሎታዋ የሚያደንቋት አርቲስት ሐረገወይን አሰፋ በዘመናዊ ልብስ
ተውባና ፊቷ እንደ ፀዳል አብርቶ ወደ መድረኩ ብቅ አለችና፤ በጣም ወደድኩት ያለችውን የአቶ በረከትን “መቼስ ምን እንላለን”
የሚለውን ግጥም አነበበች፡፡ በኋላ ላይ በሸገር ሬዲዮ ጣቢያ ግጥሙ ከመጽሐፉ የተቀነጨበ እንደሆነ ሲነገር ሰማሁ፡፡ አርቲስቷ ራሷ
በምታቀርበው ሌላ የሬዲዮ ፕሮግራምም፤ “አቶ በረከትን ግጥሙን ለማቅረብ አስፈቀድኳቸው” ስትልም አደመጥኩ፡፡ “መቼስ ምን
እንላለን” የሚለው የአቶ በረከት ግጥም ግን ጋብቻ ተከልክሎ በነበረበት የትጥቅ ትግል ወቅት አቶ በረከት በ33 ዓመታቸው በ1977
ዓ.ም በለስ ላይ ቁጭ ብለው ለአሁኗ ባለቤታቸው የጻፉት ነበር፡፡ ይኸው ግጥምም በወቅቱ የነበረው የታጋዮች ግጥም እና የፍቅር
ደብዳቤዎች በኅዳር ወር በ1998 ዓ.ም ታትሞ በወጣበት “ሶረኔ” በተባለው መጽሐፍ ላይ ተካትቷል፡፡ አርቲስት ሐረገወይን አቶ
በረከትን ማስፈቀድ አያስፈልጋትም ነበር፡፡ ሸገር እንዳለውም በአዲሱ የአቶ በረከት መጽሐፍ ውስጥ የተካተተ ግጥም አልነበረም፡፡
ሐረገወይን ግጥሙን ካቀረበች በኋላ የአቶ በረከት ስምኦን “የሁለት ምርጫዎች ወግ” የተሰኘው መጽሐፍ ገጽ ተከፈተ፡፡ መድረክ
መሪው አቶ ሴኮም የአርቲስቶቹን ስም ተራ በተራ እየጠራ “የወደድኩት፣ የሳበኝ፣ የመረጥኩት” ያሉት ነው በማለት እያስተዋወቀ ወደ
መድረክ ጋበዛቸው፡፡ እነሱም የመጽሐፉን ገፆች እየገለጡ የሳባቸውን አነበቡ፡፡ አርቲስት ሐረገወይን አሰፋ፣ አርቲስት እመቤት
ወ/ገብርኤል፣ አርቲስት ፍቃዱ ተክለማርያም፣ አርቲስት ደበሽ ተመስገን፣ አርቲስት ባዩሽ አለማየሁ እና አርቲስት መሆኑን ባላውቅም
የቀድሞው የሬዲዮ ፋና ጋዜጠኛ እና የ”50 ሎሚ” ፕሮግራም አዘጋጅ የነበረው ደግአረገ ነቃጥበብ በየተራ አነበቡ፡፡
ፕሮግራሙ ቀጠለ፡፡ የዕለቱ የክብር እንግዳ የትምህርት ሚኒስቴር ሚኒስትሩ አቶ ደመቀ መኮንን፤ ተመራማሪዎችና የተለያዩ ተቋማት
በኢትዮጵያ ዲሞክራሲያዊና የልማት ተቋማት ላይ ለመመራመር እና የዳበረ ሐሳብ ለማምጣት የአቶ በረከት መጽሐፍ መነሻ ሊሆናቸው
እንደሚችል እምነታቸው እንደሆነ ገለፁ፡፡
የመጽሐፉ፤ መታሰቢያነት ለትግሉ ባለቤቶች፣ ታጋዮች፣ የልጅነት ዕድሜያቸውን ለሰላምና ለዴሞክራሲ በተለይ በትግሉ ወቅት
ላሳለፉት ታላቅ ከበሬታ የሰጠ እና ለማስታወስ ያለመ ነው አሉ – አቶ ደመቀ፡፡ እኔም ንግግሩን ተከትዬ መታሰቢያ የተጻፈበትን ገጽ
ገለጥኩ “መታሰቢያነቱ ለወንድሜ ካሳሁን ገብረህይወት” ይሁንልኝ ብቻ ይላል፡፡ አቶ ደመቀ የገለጿቸው ታጋዮች በአቶ በረከት
መጽሐፍ የቱ ጋር እንደተጠቀሱ ፈልጌ ማግኘት አልቻልኩም፡፡
ቀጠሉና አቶ በረከት ወደ መድረክ ወጡ፡፡ በምርጫ 97 ወቅት ዋና ተዋናይ ስለነበሩ ስለሁለቱ ምርጫዎች ለመጻፍ እንደማይበዛባቸው
ገለፁ፡፡ ኢሕአዴግ የተሃድሶ እንቅስቃሴ ባካሄደባቸው 10 ዓመታት የቀድሞዋ ኢትዮጵያ እየተናደች፣ አዲሲቷ ኢትዮጵያ እየተገነባች መሆኑንም አወሱ፡፡ “ኢትዮጵያ እየተጓዘችበት ባለችበት የልማት ጐዳና ቀጥላ ውጤታማ ለመሆን 30 እና 40 ዓመታት ያስፈልጋታልም”
አሉ፡፡
ምርጫ 97ን በሚመለከት ተቃዋሚዎች ጊዜ ስለነበራቸው በወቅቱ ብዙ መጽሐፍትን እንደጻፉ የጠቀሱት አቶ በረከት፤ በኢሕአዴግ
ወገን ያለውን ለማያውቁ እውነታውን ለማካፈል ይጠቅማል በሚል እርሳቸው በተራቸው ይሄን መጽሐፍ መጻፋቸውን አብራሩ፡፡
ማንም ሰው በቀላሉ ዕድሉን የማያገኘውን የኢትዮጵያን የፖለቲካ ዳይናሚክ እርሳቸው እንዲያውቁት እና ልምድ እንዲያገኙበት ዕድሉን
የሰጣቸውን ኢሕአዴግን አመሰገኑ፡፡ “ኢሕአዴግ አስተዋይ እና አገሪቷን ከእንቅልፏ የቀሰቀሰ ድርጅት ነው” በማለትም ፓርቲያቸውን
አሞካሹ፡፡
“መለስ ለእራሱ ከባድ ሥራ ወስዶ ለሰውም ከባድ ሥራ እየሰጠ የሚያሠራ መሪ ነው” በማለት ሙገሳቸውን እና ምስጋናቸውን ለአቶ
መለስም የቸሩት አቶ በረከት፤ ከምስጋናው ሁሉ ረጅሙን ሰዓት በወሰደባቸው በሼከ መሐመድ አልአሙዲን ምስጋና ውዳሴያቸዉን
አጠናቀቁ፡፡
“የእኔ ሥራ መጽሐፉን መጻፍ ብቻ ነበር፡፡ የእኔን እና በቅርቡ የአቶ መዝሙር ፈንቴ (የባለቤታቸው ወንድም) የተረጐሙትን መጽሐፍ
አልአሙዲ እንዲያሳትመው መመሪያ ብቻ ነው የሰጠሁት፡፡ ደወልኩ እና እነዚህን መጽሐፎች ታሳትማቸዋለህ አልኩት” በማለት
መጽሐፉን ከኢትዮጵያ ውጪ ከማሳተም ጀምሮ እንዲያ ባለ በደመቀ ሥነ ሥርዐት እንዲመረቅ የማድረግ ወጪውን ሼኹ እንደሸፈኑ
ገለፁ፡፡
እኔ ግን አቶ በረከትን አንድ ጥያቄ መጠየቅ ፈልጌ ነበር፡፡ “አንድ ከፍተኛ ባለሥልጣን አንድን ባለሃብት ደውሎ እንዲህ ያለውን ትእዛዝ
መስጠት እና ተፈፃሚ ማድረግ ሙስና ነው አይደለም?” የሚል፡፡ ልብ አድርጉ ይሄ ጥያቄ ነው፡፡ የማላውቀውን ብጠይቅ ችግር ያለው
ስላልመሰለኝ ነው፡፡ ግን ደግሞ አንድ ነገር አውቃለሁ፡፡ አቶ ስዬ በሙስና ተጠርጥረው በታሰሩበት ወቅት ከቀረቡባቸው ማስረጃዎች
አንዱ፤ አንዱን የባንክ ሐላፊ ደረጃ ላይ አግኝተው ጀርባውን ቸብቸብ በማድረግ “ጐረምሳው ተባበረው” በማለት ለወንድማቸው
ትብብር ጠይቀዋል የሚል ነበር፡፡ ምናልባት ሁለቱ አይገናኙም ልባል እችላለሁ፡፡ እውነትም ላይገናኝ ደሞ ይችላል፡፡
ቀጣዩ ንግግራቸው የሁለቱን ቅርበት የሚጠቁም ነበር – የአቶ በረከትንና የአልአሙዲን፡፡ “በምርጫ 97 ማግስት ከምርጫው ጋር
ባልተያያዘ ሁኔታ ህመም ገጥሞኝ ደቡብ አፍሪካ ለሕክምና በሄድኩ ጊዜ እዛ ድረስ መጥቶ ጠይቆኝ ነበር፡፡ የልብ ወዳጆች ነን፡፡ አሊ
አልአሙዲ ወሬኛ ነው፡፡ ጨዋታ ይወዳል ውጭ አገርም ሄዶ ቢሆን ሦስት ቀን አያድርም፤ ይደውላል፤ ደውሎም ቀልድ አዋቂ ነው
ተሳስቀን ነው የምንለያየው፡፡ አሊ አልአሙዲ ሣቅ እና ዕድሜህን ያብዛልህ” በማለት ምርቃቱን አዥጐደጐዱት፡፡
ጐንደር ልማት ማኅበር (ጐልማ) ሆስፒታል ማስገንባት በፈለገ ጊዜ አቶ በረከት የከተማዋ ተወላጅ በመሆናቸው እርዳታ እንዲሰጡ
ሲጠየቁ አል አሙዲን ጋር ቀርበው 5 ሚሊዮን ብር መጠየቃቸውንና 50 ሚሊዮን ተደርጐ እንደተሰጣቸው፣ የደራሲያን ማኅበር
የአፍሪካ ደራሲያንን በጋበዙ ጊዜ ሼኹ እርዳታ ማድረጋቸውን በመግለፅ “አላሙዲን ጠይቄው አሳፍሮኝ አያውቅም” በማለት
የባለሃብቱና የእርሳቸውን ቅርበት የት ድረስ እንደሆነ አብራርተዋል፡፡
የመጨረሻው ተራ የባለሃብቱ የሼክ ሙሐመድ ነበር -እሳቸውም ጨዋታውን ቀጠሉ፡፡ “አንዳንድ ሰዎች ኢሕአዴግን ትወዳለህ ይሉኛል፡
፡ አዎ እወዳቸዋለሁ አራት ነጥብ፡፡ በምርጫ 97 ወቅት ከተሰደቡት ሰዎች አንዱ እኔ ነኝ፤ ሳይቸግረኝ የአረብ ሳተላይት አስገብቼ በየቀኑ
ሰዎቹን እሰማቸው ነበር፤ በረከትም በሩን ብርግድ አድርጐ ሰጣቸው” አሉ ሼክ ሙሐመድ “በሩን ብርግድ …” ማለታቸው ቴሌቪዥኑን
እና በምርጫ 97 የተደረገውን ክርክር ነበር፡፡ ለምርጫ ክርክር በሩን ከፍቶ መስጠት የዲሞክራሲያዊ ሥርዓት ባህርይ እንጂ የአቶ
በረከት መልካም ፈቃድ እንዳልሆነ አላብራሩም፡፡
“ለምን እንደተሰደብኩ አላውቅም እኔን እንኳን አፌን አልከፈትኩም ነበር፡፡ ግን የንብ ቲሸርት ለብሼ ከአውሮፕላን ወረድኩ፡፡ አቶ
መለስና አቶ በረከት እንኳን ለምን ሳታማክረን ለበስክ ብለው ተቆጥተውኝ ነበር፡፡ አላማክራችሁም አልኳቸው ምክኒያቱም
ባማክራቸው እንዲህ አድርግ … እንዲህ አታድርግ ስለሚሉኝ ነበር ያላማከርኳቸው” በማለት የምርጫውን ወቅት ትዝታቸውን
ለታዳሚው አወጉ፡፡
ስለ አቶ በረከት ቀጠሉ፤ “አቶ በረከት እንዳለው ደቡብ አፍሪካ ሄጄ ጠይቄዋለሁ፤ የጠየኩት ግን አመፀኛ እና ልውጣ ብሎ
ስለሚያስቸግር ነው፡፡ ታከም፣ እረፍ ሲባል እሺ አይልም፡፡ እኔ ደቡብ አፍሪካ ሄጄ መጀመሪያ ያደረኩት ክፍሉን በሴኪዩሪቲ ማስከበብ
ነበር፡፡ እሱ ግን በኋላ የብአዴን 25ኛ ዓመት በዓል ላይ ካልተገኘሁ ብሎ አስቸገረ ቃል አስገብቼ ይዤው መጣሁ፡፡ በ48 ሰዓት ውስጥ
አንጠልጥዬ መለስኩት፤ እኔን የሚያሳስበኝ የጤናቸው ጉዳይ ነው፡፡” በማለት ሚስጥራቸውን አጫወቱን፡፡ ከዚህ ጨዋታቸው
አልአሙዲ ለኢህአዴግ ባለስልጣናት የጤና ጉዳይ እንደሚጨነቁ ተገነዘብኩ፡፡ በአቅም ማነስ ህክምና ሳያገኝ ጤናው የሚታወክ
ባለስልጣን አይኖርም ብዬ ደስ አለኝ፡፡ የባለሥልጣናትን የጤና ጉዳይም ለባለሃብቱ ተውኩላቸው፡፡ሼክ መሐመድ ቀጠሉ፤ “ከዋናው ሰውዬ ጀምሮ ወዳጆች ነን፤ ተግባብተን እና ተቻችለን ነው የምንኖረው፤ እኔ ግን አንድ ቀን እንዲህ
ሆንኩ ብዬ ቅሬታ አቅርቤላቸው አላውቅም እንደውም እነሱ እንደኔ ሁሉንም የሚጭኑበት ሰው የለም” አሉ፡፡ እውነት ከሆነ ኢህአዴግ
ምን ነካው ያስብላል፡፡ ወይስ ከባለሃብት ጋር መሞዳሞድ እንዳይመስልበት ፈርቶ ይሆን?
በመጨረሻም ሼኽ መሐመድ “እስከ ህይወት ፍፃሜ ድረስ አብረን ነን” ሲሉ ማሉ፡፡ አቶ በረከትም በጭብጨባ መሐላውን አፀኑላቸው፡
፡ ታዳሚውም አጨበጨበ፡፡ አጨብጭቦም ወደ ቤቱ አልሄደም፡፡ “ምን ጠፍቶ” የተባለለትን የሸራተንን ድግስ እስኪበቃው ተቋደሰ፡፡
የ”ሁለት ምርጫዎች ወግ” በወፍ በረር ቅኝት
የ”ሁለት ምርጫዎች ወግ” የሕትመት ደረጃውን የጠበቀ፣ 314 ገፆች ያሉት መጽሐፍ ነው፡፡ ጽሑፉ ያልተጨናነቀ፣ ዘርዘር ብሎ
የተቀመጠና ለማንበብ ምቹ ነው፡፡ “የብራ መብረቁ የኤራትራ ወረራ” በሚል ርእስ የቀረበው የመጽሐፉ የመጀመሪያ ምዕራፍ፤ የኢትዮ –
ኤርትራ ጦርነት አጀማመር እና አጨራረስን በ48 ገፆች ይተርካል፡፡
የኢትዮ ኤርትራ ጦርነት የተጀመረው በኤርትራ መንግሥት በአቶ ኢሳያስ አፈወርቂ ትንኮሳ መሆኑን በመጥቀስ፤ “የኢሳያስ መንግሥት
ከጦርነት በስተቀር ለሰላም ፈፅሞ ዋጋ የማይሰጥ መሆኑ እየተረጋገጠ በሄደ ቁጥር ነገሮች ወደ ነበሩበት ለመመለስና ጦርነቱን በአጭር
ለመቋጨት የሚያስችሉ ጠንከር ያሉ ወታደራዊ ርምጃዎችን ወደመውሰድ ተሸጋገርን” ይላሉ፡፡ ቀጠል አድርገው የመከላከያ ሠራዊቱ
ባድመን ማስመለሱን ገልፀው በዚህም የኤርትራ መንግሥት ወደ ድርድር የመምጣት አዝማሚያ አሳይቶ እንደነበር አውስተው ወረድ
ይሉና፤ “ይሁንና ዛላምበሳንም ነፃ ለማውጣት የነበረንን እቅድ ተግባራዊ ለማድረግ በፆሮና ግንባር የከፈትነው ሌላ ማጥቃት
እንዳሰብነው ሳይሄድ በመቅረቱ የኢሳያስ የጦረኝነት ልክፍት እንደገና ማገርሸት ጀመረ” በማለት ጦርነቱ በኢሳያስ የጦረኝነት ልክፍት
ግፊት ምክንያት መቀጠሉን እንዲሁም ጦርነቱ በኢትዮጵያ እና በኤርትራ መካከል ያለ ውዝግብ መሆኑን ይጠቅሳሉ፡፡ ከዚያም ሲቀጥሉ፤
“ወደ ጦርነቱ መገባደጃ የአቋም ልዩነቶች እየተሸጋሸጉ ከሄዱ በኋላ ግን በአንድ በኩል ሁሉም ነገር ወደ ጦር ግንባር ብለው ጦርነቱን
ለማራዘም የሚፈልጉት የእነ አቶ ተወልደ ወልደማርያም እና አቶ ስየ አብርሃ ወገን፣ በሌላ በኩል ደግሞ ጦርነቱ በአጭሩ ተቋጭቶ
ፊታችንን ወደ አገራችን ልማትና የኢሕአዴግ ውስጣዊ ችግሮች ወደ መፍታት ማዞር አለብን የሚለውን የአቶ መለስ ዜናዊን ሐሳብ
የሚጋሩ ወገኖች በለየለት የአቋም ልዩነት የሐሳብ ትግል ውስጥ ገቡ፡፡ አቶ ስየ በርከት ባሉ አጋጣሚዎች መሳሪያና ተተኳሽ ለመሸመት
ወደ ቀድሞዋ ሶቭየት ሕብረት አካባቢ ይመላለስ የነበረ ይሁን እንጂ በኢሕአዴግ ውስጥ በተነሳው ልዩነት “ጦርነቱ የወሰደውን ጊዜ
ይውሰድ ኤርትራን ለማንበርከክና ከተቻለም አሰብን ቆርሰን ለማምጣት ልንቆጥበው የሚገባ ህይወትና ሃብት ሊኖር አይገባም”
የሚለውን አቋሙን ለማራመድ እና በዚህ አቋሙ የተቧደነ አንጃ ለመፍጠር የሚሆን ከበቂ በላይ ጊዜ ግን ነበረው፡፡” በማለት እርሳቸዉ
አስቀድመው “ጦረኛ” ያሏቸውን የኢሳያስ መንግሥትን እስከመጨረሻው እንዋጋ የሚል ሐሳብ እንደነበራቸው በተዘዋዋሪ ያረጋገጡልንን
እነ አቶ ስየን የጦረኝነት አስተሳሰብ ያላቸው በማለት ይተቿቸዋል፡፡
የኤርትራ መንግሥት የኢትዮጵያን መሬት መውረሩን፣ ፀረ ሰላም መሆኑን፣ ጦረኛ አስተሳሰብ ያለው መሆኑን ያልካዱት አቶ በረከት፤
ይህን ኃይል እስከ መጨረሻው ሄደን እንዉጋው ያለውን ቡድን ግን “የጦረኝነት አስተሳሰብ ያለው፤ ጀብደኝነት የተጠናወተው”
ማለታቸው እርስ በርሱ የሚጣረስ ሆኖብኛል፡፡ “የኢሳያስ መንግሥት መሸነፉን ሲያውቅ በወቅቱ የተባበሩት መንግሥታት ዋና ጸሐፊ
ለነበሩት ኮፊ አናን በእኩለ ሌሊት ደውለው የሰላም አማራጭ ለመቀበል ዝግጁ መሆናቸውን በማሳወቃቸው ጦርነቱ ሙሉ ለሙሉ
መቆሙን ያወሱት አቶ በረከት፤ ከጦርነቱ በኋላ ያለውን ጊዜ ኢሕአዴግ ከጥገኛ ዝቅጠት ወጥቶ ወደ ተሃድሶ የገባበት የሽግግር ወቅት
እንደነበር በመጠቆም የምርጫ 97 ወጋቸውን ቀጥለዋል፡፡ የአቶ በረከት የምርጫ 97 ወግ በሚጀምርባቸው የመጀመሪያ ገፆች “የቀለም
አብዮት” ያሉትን የምርጫ 97 ተቃውሞ “ለብዙ ኢትዮጵያውያን የመጀመሪያው የቀለም አብዮት ጠንሳሽ ቅንጅት የሚመስላቸው
ቢሆንም፣ የየፓርቲዎቹን ፈለግ ለተከተለ ሁሉ የመጀመሪያው የአመፅ ስትራተጂ ቀያሽ ሕብረት እንደነበር ለመገንዘብ አያዳግትም”
በማለት ሕብረትን በመተቸት ይጀምራሉ፡፡
“ቅንጅት” እና “ሕብረት”ን እንደ ፓርቲ በግለሰብ ደረጃ ደግሞ ዶ/ር ነገደ ጎበዜ፣ ፕሮፌሰር በየነ ጴጥሮስ፣ ዶ/ር ብርሃኑ ነጋ፣ ኢንጅነር
ግዛቸው እንዲሁም አንዴ ወጋ ሌላ ጊዜ ደግሞ ወዳጅ በሚመስል ሁኔታ ኢ/ር ኃይሉ ሻውል እና አቶ ልደቱ አያሌውን እና ሌሎች
የተቃዋሚ ፓርቲ አባላትን የአውሮፓ ሕብረት አመራርን እና የአውሮፓ ሕብረት አመራርን እና የአውሮፓ ሕብረት የምርጫ ታዛቢ
ቡድን መሪ አና ጎሜዝን በጠንካራ ትችት የሚያነሳው መጽሐፍ፤ በምርጫ 97 ተቃዋሚ ፓርቲዎች ሕግ ጥሰው ሕዝቡን ለዐመፅ
የቀሰቀሱ፣ የማይረቡ፣ ሥልጣን የተጠሙ፣ አገሪቷን የማያባራ ቀውስ ውስጥ ለመክተት ያለሙ፣ እርስ በርሳቸው የማይስማሙ እንደሆኑ
በመግለፅ ክፉኛ ይተቻቸዋል፡፡ አቶ በረከት በወቅቱ የነበረ ሂደት ነው ያሉትን ሲተርኩ፤ ኢሕአዴግ ሰላማዊ ፓርቲ እንደሆነ እና
ምርጫው ሁለት ዓመት እስኪቀረው ጊዜ ድረስ የተሃድሶ ወቅት ላይ በመሆኑ የምርጫ ስራ ካለመሥራቱ ውጪ ፓርቲውን
“የመላእክት” ያህል ንፁህ፣ ሕዝቡን ወዳድ የምርጫውን ውጤት በሰላም የተቀበለ ፓርቲ አድርገው ስለውታል፡፡ ከምርጫ 97 በፊት
ያለውን ሁለት ዓመት እና ከምርጫ 97 እስከ 2002 ዓ.ም ድረስም በሚገባ በመሥራቱ በኢትዮጵያ ሕዝብ የተወደደደ እና የተፈቀረ
ፓርቲ በመሆኑ ሕዝብ መርጦት ሥልጣን ላይ መውጣቱን ተርከዋል፡፡
በመጽሐፉ ምዕራፍ ሦስት ላይ፤ በምርጫ 97 ግንቦት ሰባት ምርጫው ሳይጠናቀቅ ኢንጀነር ኃይሉ ሻውል ድርጅታቸው በአዲስ አበባ
ምርጫ እንዳሸነፈ ነገር ግን ኢሕአዴግ ምርጫውን እንዳጭበረበረ መግለፃቸውን ከባድ ድፍረት በማለት ይተቹና፤ “ድምፅ የመስጠቱ
ሂደት እንደተጠናቀቀ አቶ መለስ እሁድ ምሽት በቴሌቭዥን ቀርቦ ምርጫው በጥሩ አኳኋን እንደተካሔደ ከገለፀ በኋላ የተጋጋለው ስሜት እንዲበርድ እና ሕዝቡ የምርጫውን ውጤት በሰከነ አእምሮ አመዛዝኖ እንዲቀበለው ለማድረግ በማሰብ መንግሥት ለአንድ ወር
ሰላማዊ ሰልፍ እንዲታገድ መወሰኑን አስታወቀ” ከማለት ውጪ አቶ መለስ በቴሌቪዥን ቀርበው ኢሕአዴግ ምርጫውን ማሸነፉን
ስለመናገራቸው አንድም ቦታ አይጠቅስም፤ እሳቸዉንም አይወቅስም፡፡
አቶ በረከት ከተቃዋሚ ፓርቲ አመራሮች ጋርም ሆነ ከአውሮፓ ሕብረት መሪዎች ጋር የነበራቸውን ውይይት ሲጠቅሱ፤
“አስጠነቀቅናቸው፣ በወንጀል እንደሚጠየቁ ነገርናቸው፣ ጠንከር ያለ ስምምነት እንዲፈርሙ አደረግናቸው” የሚሉ የድርድር ሳይሆን
የኢሕአዴግን የበላይነት የሚያሳይ የማስፈራራት ሂደት እንደነበር የሚያሳይ መጽሐፍ ነው፡፡
ዶ/ር ብርሃኑ ነጋ ላይ የሚጨክነው የአቶ በረከት መጽሐፍ፤ “ከንቲባነትን በቆረጣ” በሚል በተቸበት ርእስ ስር ከምርጫ 97 በኋላ
ያለውን ሂደት፤ “ለዶ/ር ብርሃኑ የሁሉም ነገር ማጠንጠኛው የከንቲባነት መንበሩን መቆናጠጥ ስለነበር፣ ለእርሱ ቅንጅትም ሆነ ቀስተ
ደመና፣ መኢአድም ሆነ ኢዴፓ የቼዝ ጠጠሮች ናቸው፡፡ በእንያንዳንዱ እርምጃው እንደ አመቺነቱ በተናጠል ወይም በቡድን የላቀ
ችሎታ ባለው ኃይል ፊት ያጋፍጣቸዋል፡፡ ሲፈልግ ሰድቦ ለሰዳቢ ይሰጣቸዋል፡፡ ኢንጂነር ኃይሉን የሚፈልጋቸው ተሸክመው ወደ
መንበረ ከንቲባነቱ እንዲያመጡት ስለነበር በአንድ በኩል እየተለማመነ፣ በሌላ በኩል ግን ገንዘብና መረጃ እየሰጠ በሚያሰማራቸው
“ቤዛ”ን በመሳሰሉ የግል ጋዜጦች ይሰድባቸዋል፡፡ የቅንጅት ሚስጥሮች፤ በተለይም ኢንጂነር ኃይሉን የሚመለከቱና በየጋዜጠው ይወጡ
የነበሩ ውስጣዊ መረጃዎች ከዶክተር ብርሃኑ የሚፈልቁ እንደነበሩ በአንድ አጋጣሚ ያገኘሁትና ዶ/ር ብርሃኑ እንዲህ ብለህ ጻፍ እያለ
መረጃ፣ ምክርም ገንዘብ ይሰጠው እንደነበር ያጫወተኝ በግል ጋዜጣ ውስጥ ይሠራ የነበረ ጋዜጠኛ ነው” ይላል፡፡
እዚህ ጋር ግን መረጃ ተጣርሷል፡፡ አቶ በረከት ዶ/ር ብርሃኑ “ቤዛ”ን በመሳሰሉ ጋዜጦች ላይ ያጽፍ ነበር ያሉት ከምርጫው በኋላ ባለው
ወቅት ሲሆን የጠቀሱት “ቤዛ” ጋዜጣ የተዘጋው ግን በሚያዝያ ወር 1992 ዓ.ም ነበር፡፡ በተጨማሪም አቶ በረከት አንድ ጋዜጠኛ ነገረኝ
በሚል የ2002 ምርጫ ሁኔታን በጻፉበት ምዕራፍም፤ “አዲስ ነገር” ጋዜጣ በቀድሞው የአሜሪካ አምባሳደር ዶናልድ ያማማቶ እርዳታ
በአሜሪካ ኤምባሲ የገንዘብ ድጋፍ መቋቋሙን ገልፀው ይህንንም “በግሉ ፕሬስ ውስጥ የሚሠሩ ጋዜጠኞች ናቸው የነገሩኝ” በማለት
ጽፈዋል፡፡ እንዲህ ያሉ ነገሮችን ለመጻፍ በማስረጃ ላይ የተደገፈ እርግጠኝነት የሚያስፈልግ ሲሆን ጋዜጠኞች ነገሩኝ በማለት ብቻ
እንዲህ እያሉ መጻፍ ትዝብት ውስጥ የሚጥል ጉዳይ ይመስለኛል – ያውም ከአንድ ከፍተኛ የኢህአዴግ ባለስልጣን፡፡ በመጨረሻም
መጽሐፉ በአቀራረቡ፣ በአተራረኩ እና በታሪክ አወራረዱ የአቶ በረከትን የመጻፍ ችሎታ የማያሳማ ሆኖ አግኝቼዋለሁ፡፡ ይዘቱ ምንም
ሆነ ምንም መጽሐፍ መጻፋቸው በራሱ ሌሎች እንዲጽፉ የሚገፋፋ፣ በጽሑፉ ላይ እንዲወያዩ እና ወደ እውነት እንዲጠጉ በር
የሚከፍት በመሆኑ አቶ በረከት “የሁለቱ ምርጫዎች ወግ”ን በመጻፋቸው ሊመሰገኑ ይገባል እላለሁ፡ በተረፈ ያነበቡት ደግሞ
ሐሳባቸውን ቢያጋሩ ለመማማር ይጠቅመናል ይበረታታልም፡፡
(ምንጭ – አዲስ አድማስ)
ኢትዮሚድያ እንዳቀናበረው
December 24, 2011

%d bloggers like this: